81 ఏళ్ల వయసులో ప్రపంచ యాత్రలు.. యువతకు స్ఫూర్తినిస్తున్న బామ్మ!

 81 ఏళ్ల ఓ బామ్మ.. వయసు కేవలం ఒక సంఖ్య మాత్రమేనని, సంకల్పం ఉంటే ఏదైనా సాధించవచ్చని నిరూపిస్తున్నారు. వ్యాపారవేత్తగా, ప్రపంచ యాత్రికురాలిగా ఎంతో చురుకైన జీవితం గడుపుతున్న తన బామ్మ గురించి మనవరాలు, ఎంట్రప్రెన్యూర్ మెహర్ తూర్ పంచుకున్న ఓ వీడియో ఇప్పుడు సోషల్ మీడియాలో వైరల్ అవుతోంది. ఈ వయసులోనూ ఆమె ఉత్సాహం, జీవనశైలి, ఆత్మవిశ్వాసం నెటిజన్లకు స్ఫూర్తినిస్తున్నాయి.

ఈ వీడియోలో మెహర్ తన బామ్మను ఒక వ్యాపారవేత్తగా, యాత్రికురాలిగా పరిచయం చేశారు. ఇటీవల ఏం చేశారని, ప్రయాణాలు ఇంకా కొనసాగిస్తున్నారా? అని మనవరాలు అడగ్గా, ఆ బామ్మ ఎంతో ఉత్సాహంగా స్పందించారు. తాను ఇటీవలే అలస్కాకు క్రూయిజ్ యాత్రకు వెళ్లి వచ్చానని, ఆ ప్రయాణాన్ని చాలా ఆస్వాదించానని చెప్పారు. 

81 ఏళ్ల వయసులో ఒంటరిగా వెళ్లారా? అని మెహర్ ఆశ్చర్యంగా ప్రశ్నించగా.. "నేను ప్రపంచంలో ఎక్కడికైనా వెళ్లగలను అనే పూర్తి విశ్వాసం నాకుంది" అని ఆమె ఎంతో ధీమాగా సమాధానమిచ్చారు.

యువతకు బామ్మ‌ సలహా ఇదే!
అనంతరం నేటి యువతకు మీరిచ్చే సలహా ఏంటని? మనవరాలు అడగ్గా.. ఆ బామ్మ ఎంతో చక్కగా వివరించారు. "యువత తమ జీవితాలను బాగా ఆస్వాదించాలి. కష్టపడి పనిచేయాలి, మంచి ఆహారం తినాలి. అదే సమయంలో తమను తాము జాగ్రత్తగా చూసుకోవడం కూడా చాలా ముఖ్యం" అని ఆమె హితవు పలికారు.

తన 81 ఏళ్ల బామ్మ తనకంటే చాలా చురుకుగా ఉంటారని మెహర్ తన పోస్టులో రాశారు. ఆమె ఒంటరిగా జీవిస్తున్నారని, ఇప్పటికీ ప్రపంచ యాత్రలు కొనసాగిస్తున్నారని, కిట్టీ పార్టీలతో ఆమె క్యాలెండర్ నిత్యం బిజీగా ఉంటుందని, ఆమెలోని స్ఫూర్తి అద్భుతమని పేర్కొన్నారు.

నెటిజన్ల ప్రశంసల వర్షం 
ఈ పోస్ట్ సోషల్ మీడియాలో పెట్టగానే వేలాది మంది స్పందించారు. నెటిజన్లు ఆమెపై ప్రశంసల వర్షం కురిపిస్తున్నారు. "మా ఫేవరెట్ సూపర్‌వుమన్" అని ఒక యూజర్ కామెంట్ చేయగా, "ఆమె చాలా అందంగా ఉన్నారు" అని మరొకరు అన్నారు. 

"నేను భవిష్యత్తులో ఇలాంటి బామ్మనే అవ్వాలనుకుంటున్నాను" అంటూ మరో యూజర్ తన ఆకాంక్షను వ్యక్తం చేశారు. మొత్తం మీద ఈ బామ్మ జీవనశైలి ఎంతో మందికి ఆదర్శంగా నిలుస్తోంది.